Schwäbisches "Ars vivendi"

I han a mol, scho lang isch`s her,
obändig Durschd ghett, drunka han i no mehr.
Weil`s in dennr Wirtschaft au so gmiatlich war!
Do war für mi dann immr ganz klar,
laut und deitlich "Ja, freile!" zum saga,
wenn ma gfrogat hat, ob i no a Viertele ka vrtraga.
Des wär au no gar id so schlimm gwesa,
wenn i auf oimal id alles doppelt hett gseha.
Zerschd han i denkt, des isch gschickt,
dass i jetzt werd von zwoi Viertele beglückt,
wo doch oi Viertele im Nu leer war, 
aber dia zwoi waret genauso schnell gar.
Irgendwann han i dann an`s Hoimganga denkt,
aber beim Aufschdanda han i scheinbar z`arg nach rechts glenkt,
weil i bin ganz plötzlich am Boda glega.
No han i mir gsagt: "Jetzt muasch di erschd mal wieder pflega!",
und han glei no nach ma Viertele gschria.
Aber d`Bedienung hat gmoint: "No a Viertele, nia!"
Des han i jetzt scho glei gar id vrschdanda kenna!
Wia hat dia kenna an jeden Tisch mit ma Viertele narenna, 
wo se doch zu mir gsagt hat, i kriag nix mehr.
Also han i dennr no mal gwunka her.
I han jetzt ganz höflich gfrogt, ob i no a Viertele kriag.
Do hat dia zur Antwort geba: "4, noi dass i id liag,
5 Viertele hasch scho ghett, roicht dir des id?", 
isch ganga und hat mei leers Glas gnomma mit.
Notgedrunga bin i no ganga hoim,
des hoißt, vrzehlat`s aber koim,
i han mi hoim schloifa müssa.
Dass ma 5 Viertele glei so muß büssa!
Am nächschda Morga hat mei Frau erschd mal rumgmault und no gfrogat:
"Wia ma bloß so saufa ka?" Mi aber hend andre Sorga plogat.
I hett in dem Moment au gar id gwüsst,
warum eigentlich dia Sauferei sei müsst.
Erschd a bar Wocha später, wo a Viertele wieder gschmeggt hat,
han i erklärt: "Dia Sauferei ab und zua isch halt a Wohltat!"