Feschtleszeit

Äll Woch a Feschtle, en dera Zeit,
bei so-ma Wetter da ischs so weit.
Dia oine hent-a Jubiläom,
ond andre hocket so halt rom.	
Älle freiat sich gottsallmächtig,
wenn´s z-trenket geit ond-s Wetter isch prächtig.
Ond was dó älles geit beim hocká
do bisch tatsächlich von de Socká.
Rotwei, Weißwei, Bier ond Schbrudel,
dr-zua gibt’s au a Schneckanudel.
Türkisch, Polnisch, Potugisisch.
Schwäbisch, Grichisch und Rumänisch.
Leit, was bei dene älles geit,
send Schbezialitäta , heit.
Pfannakucha, gfillde Gees,
Knoblich drenn em Luckeleskäs,
Tomata, Giros, Pizza, Zucker,
do duats em Maga rechte Rucker.
So gibt`s hald do globale Speisá
ond jeder duat sich darom reißá.
Sauerkraut ond Buabaspspitzlá,
nebadrà hört ma no Witzlá.
Dia oine sitzet ganz ruhig dó,
ond andre schwätzat an se nó,
a-Onderhaltung kaahst vergessa,
d-Kapella spielet wia versessa.
D-Leit ganget aber trotzdem ná,
weil, weil mr sich onterhaltà ká.