No net ganz wach vom scheena Traum
scho hann i mei ganze Gosch voll Schaum.
An Weck schmeckt bessr um die Zeit
des sag i euch ihr liebe Leit.

I schpuck erschtmol ins Waschbecka
und du mei Gsicht mit Schaum bedecka.
Des seifig Zeigs isch jetz am Kinn,
do solls au no, des isch dr Sinn.

An Fremdr schteht gegaübr in meim Bad
do fühl i mi ja scho ganz malahd,
an seim Kopf an riesa Gsichtspriegl,
oh Gott! S binn ja i im Schpiegl

I will d Schlof mir aus d Auga reiba,
doch besser lesst mr des glei bleiba
mit Seif am Fingr, au weh des brennt.
Kreuz und quer durchs Bad wird grennt.

Zeit wird knapp, i muss se nutza
z erscht du i Kottletta schtutza.
Mitm flotta Schwung mei Hend empor,
a Schtückle fählt jetzt von meim Ohr

Mit Vorsicht fahr i übr d Backa
scho dut mi Klinge nomol zwacka.
Rot kommts glei raus wie n Wassrfall,
abr jetzt isch mir des au egal.

Dr Schnäuzr, der muss au no wägg,
des Ding des hat doch eh koin Zweck.
S gangt weitr bei meim Höllaritt,
Autsch! An dr Nos isch au an Schnitt!

No denk i so wie mit Weh und Leid,
d Grurgl braucht koi hoorigs Kleid,
i setz oh, do jetzt blos net hudla,
scho fangt des Blut oh mit z schrpudla.

A bissle Glück, des hann i grad no ghett
koi tiefe Schnitt, s war nur net nett.
S ganze Gsicht isch vollr Pflaschtr
wie nachm Uhfall mitm Laschtr.

D Schnauza voll, aus hälsch des net,
vrletzt - kaum bisch morgns ausm Bett.
Mit alte Klinga kosch mi nimme locka.
Ab Morga - rasier i mi wiedr trocka.

/* Nach nr (fascht) wohra Begebaheit. */