Neuffender Tälesweinlese Oktober 2009

Dr Nebel wabbert noch über dr Berg
Doch d`Wenzer em Tal gehn scho ans Werk
"Vadder": ruft Mudder froh ond monder
"gell" mir leset heut Burgonder!"
 
Schnell die Zuber uff d`Waga,
au a Butt zom Trauba traga.
Dr Fahrtwend blädrat uff die Backa,
en Wengert goht´s mit Affazacka.
 
Derweil en Rohrstiefel stapfet ond schlurfed
scho dia Leser om Roiha ond Kurva.
Des Laub isch nass, dia Händ send kalt
Ond Nebel isch no emmer über dr Alb.

Dochs schenste isch, s`kommt d`Mittagszeit
ischt Wengertsfrau au gar net weit,
an jedem Arm an rießa Grätta,
schnauft se durch d`Wengert, übern Lätta.

On no wird auspackt, do dätsch glotza
Do ket dr Lafer au net  motza.
Brot ond Käs ond Schenkawurscht
Au en Wei geihts für dr Durscht.

Noch dem Feschtmahl mach mer weiter,
net so schnell, doch dofür heiter,
ond emmer öfter schreit ois doll,
Oimer, Oimer, i hau voll!

Butt om Butt en Zuber klatscht,
ond dr Bauer in sei Händ sich batscht.
Dr Traubaberg steigt in die Höh,
ach -  wie ischt des ernta schee.

Plötzlich rufts: "Horch" mir hens gschwätzt!
"Siehscht" : mir hen ons doch verschäzt!
Fahr ens Tal ond trödel net,
den dia Gschirrla langet et.

Sen no alle Trauba ronter,
fahrt dr Fendt ens Täle nonter.
Haltet an dr Kelter a,
ond scho kommt dr Sauger dra.

Ruckzuck send die Zuber leer
Ond dia Neuffner frein sich sehr.
Viele Öchsla, ond gnuag  Masse,
no wird der Wei scho superklasse!
  
Ond sitzat mr no dzema ond genießat dr Wei
No denk ma -  beim Herbschta - ha des war halt fei. 
Mr hoffet das d`Burg Hohenneuffa, no lang
wacht über de Neuffner ihrem sonniga Hang.